ERASMUS +

Aurrera goaz Erasmus+ akreditazioarekin lortutako ekintzekin. Batetik, DBH 3ko 22 ikasle Groninga herrira doaz apirilean (Haren Lyceum eskolara) (Herbehereak). Gurean izan ziren urrian gure eskola eta familietan eta orduan hasitako proiektua lantzen jarraituko dute beraiekin Community Manager irakasgaiko ikasleek: Informazioa eta medioen alfabetatzea eta astebetez egongo dira atzerrian.

Bestetik, Batxilergo 1. mailako beste 22 ikasle Belgiraka (Sint Aloysius eskolara) joan ziren astebetez. Aste honetan aldiz (otsailak 25-martxoak 3), 22 ikasle belga hauek gure komunitatean ditugu eta gure proiektuan garapen jasangarriko 17 helburuetako batzuk lantzen ari gara herri eta toki ezberdinak ezagutuz. Proiektuaren izena RAINBOW NATIONS da eta elkarlanean proiektu txiki bat burutzen dugu.

Hau dela eta aste honetan zehar proiektu anitz, herri ezberdin eta museo batzuk bisitatuko ditugu; azpimarratzekoa, Bilbora Itsasmuseum eta BBK kunan bisita eta ikastaro gidatuak egingo ditugu 18 helburu jasangarriak ezagutuz eta egunerokoan aplikatuz, Donostia beste begi batzuekin ezagutuko dugu (zenbaterainoko jasangarria da, nola eratu etorkizuneko hiria), Tolosaldea LH ko ikasleek ere Udalarekin elkarlanean dauzkaten proiektuak aurkeztuko dizkigute, plaka solarrak, eolikoen bisita birtuala... azaldu eta erakutsiko dizkigute). Nola ez, herri kirolak eta Tolosa eta gure kultura eta hizkuntza ezagutara emango dizkiegu eta azpimarratzekoa ere Tolosako Udalak gaur (otsailak 26) egin digun harrera Udaletxean.

Ezin gara ahaztu, aurtengo lehen ebaluaketan ORIXE BHIko ikasle bat DBH 4ko ikasketak egiten dituela Irlandako Glenamaddy eskolan. Azkenik, bi irakasle ere urrian Maltan izan ziren “Artificial Intelligence in Education” ikastaroa egiten.

Otsailaren 6an internet seguruaren eguna ospatuko da eta Orixen hainbat saio antolatu dira ikasle eta gurasoei zuzenduta otsailan zehar. Saioak Pantallas Amigas eta Basque Cibersecurity Center erakundeek eskainiko dituzte elkarlanean. Hauek izango dira landutako gaiak:

Otsailaren 5, 6 eta 7an 

  • DBH 1. Segurtasuna eta pribatutasuna Interneten
  • DBH 2. Alfabetizazio mediatikoa eta digitala
  • DBH 3. Indarkeria-mota desberdinak testuinguru digitalean. Prebentzioa.

Otsailaren 19 eta 20an

  • Batxilergoa 1 mailan pantailen gehiegizko erabileraren prebentzioa eta kontrola. Otsailaren 19 eta 20an egingo dira saioak.

Gurasoekin ere saio bat antolatu da pantailen gehiegizko erabileraren prebentzioa eta kontrolaren inguruan. Otsailaren 27an izango da 17:30etan Orixeko liburutegian. Aurrez izen ematea gomendatzen da aforoagatik.

Samaniegoren 50. urteurrena

Leidor Aretoa lepo bete zen atzo 50. urteurrena ospatzeko Samaniegok sortu duen abesti eta bideokliparen estreinaldian. Hunkigarria benetan ikasleek eta Juantxo Arakama, Nikotinak eta Ayveek eskainitako ikuskizuna eta festa. #50urteurrenasamaniego #bideoklipa #tolosakoeuskaleskolapublikoa @nikotinamusika @ayvee_musika @juantxoarakama.

 

EKAINBERRIRA BISITA

Aurreko astean, DBH1-eko ikasleek Zestoako Ekainberrira egin genuen irteera. Bertan Ekain kobazuloaren erreplika bisitatu genuen, eta duela 13.000 urteko biztanleek eginiko arteaz gozatu genuen: bereziki zaldiak irudikatzen zituzten arren, hartzak, bisonteak eta arrain baten buztana dena uste dutenaren irudiak ikusi genituen. Eta bereziki labar-artea ikusi bagenuen ere, bertan zegoen kobazuloetako hartzaren hezurdura oso bat ere ikusi genuen, bere letagin eta guzti!

Azkenik, Paleolito garaiko ehiza teknikak praktikan jarri genituen. Ederki ibili ginen! Badugu zer ikusi eta ikasi oraindik!!

IKUSI ARGAZKIAK

Charleville Mézièreseko ikasleekin elkartrukea

Ekintzaz beteriko astea pasa dute 4. DBHko frantseko ikasleak Charleville Mézièreseko ikasleekin elkartrukean. Astelehenean Reims hiria, asteartean Sedaneko gaztelua eta azken egunean txontxongilo tallerraren ondoren altxorraren bila.

Ez dute aspertzeko aukerarik izan.

Maiatza bukaeran jasoko ditugu gure familietan frantsesak eta orduan izango dugu eman diguten harrera ona itzultzeko aukera. À la prochaine ! 

Miren Amurizaren hitzaldia

 

Aurreko ostiralean, abenduak 15, Orixe ikastetxeko Batxilergoko bigarren mailako ikasleek hitzaldia izan zuten Tolosako Kultur Etxean Miren Amuriza bertsolari eta idazlearekin. Azken asteetan “Basa” eleberria irakurri dute Euskara ikasgaian, eta bertan Sabina izeneko emakume gogor baten bizitzaz, baserrian daraman bizimoduaz eta ohoreari lotutako zenbait barne arazoz hitz egiten du. Bestalde, familia arteko erlazioak eta zaintza bezalako gaiak ere azaltzen dira.

Hitzaldian liburuaren jatorriaz, adinako emakumeen estereotipoaz eta bizitzako bizipenak sakonki ulertzen saiatzearen garrantziaz mintzatu zen idazlea, eta hausnarketarako zenbait gai proposatu zizkien ikasleei.

Irakurleek liburuaren inguruko galderak egiteko aukera ere izan zuten, liburuaren ulerpen sakonago bat jaso zezaten eta Miren Amurizak ezkutuan utziriko ezaugarriez jabe zitezen. Eta hitzaldiaren amaieran idazleak liburuak sinatu zizkien ikasleei, ekitaldiaren oroigarri polit bat izan zezaten esku artean.

Beraz, Miren Amurizari eskerrak ematea baino ez da geratzen, Basa eleberria idazteagatik eta ikasleei hain hitzaldi interesgarri eta aldi berean baliotsua emateagatik.

"Lurpea Garbi"ren bisita

 

"Lurpea Garbi" izeneko elkarteak bisita egin digu.

Kideek Tolosaldeako kobazuloen egoera larriaz informatu digute, kobazuloetatik sekulako zabor pila atera dute eta Orixeko liburutegian ikusteko aukera izan dugu. Kobazuloak zein garrantzitsuak diren eta hauek zikintzeak zer nolako arriskuak ekar ditzakeen ikusi eta ikasi dugu.

Mila esker Angel, Eneko, Koldo eta Uxue egiten ari zareten lanarengatik. Jarraitu horrela! 

ARGAZKIAK IKUSI

Charleville-Méziere hirian elkartrukean

Beste urte batez Tolosako udalak eta Charleville-Mézière hiriek duten senidetzeari esker Orixeko 4.DBHko frantseseko ikasleak, Laskorain eta Herrikideko ikasleekin batera Charleville-Méziere hirian daude elkartrukean. Ostiralean Lycée Saint Paul eskola eta hiria bisitatu ondoren udaletxean harrera egin zieten. Asteburua familietan pasa dute bertako kultura eta ohiturekin bat egiten.

Euskalgintzaren Kontseiluaren hitzaldia

Urtero bezala iritsi zaigu abenduaren 3a, euskal herritarrontzat egun garrantzitsua gure hizkuntzaren eguna baita. Hau dela eta Orixe ikastetxeko ikasleek zenbait ekintza izan dituzte honekin lotuta. Batxillergoko 1.mailako ikasleek Euskalgintzaren Kontseiluak emandako hitzaldi bat izan dute, gaur, abenduaren 5ean. Hitzaldi honen bitartez euskararen historia pixka bat erakutsi nahi izan zaie gazteei, hizkuntza berezi eta oso zaharra baita, historia bai baina euskararen erabileraz ere hitz egin da hitzaldian zehar, horretarako oso adibide argia agertu da ikasle batzuen ahotatik, eta egunerokotasunean oso argia dena, zergatik ez da ia batere euskararik erabiltzen sare sozialetan? Galdera honekin pentsatzen jardun dute ikasleek eta zenbait erantzun iritsi dira. Euskaraz gain beste hizkuntza batzuk ere aipatu ditu aurkezleak, horien artean irlandesa, hau ere gure hizkuntza bezalaxe berezia baita. Ikasleak gustura atera dira hitzalditik.

 

"Beldur Barik" sari banaketa.

Abenduaren 1ean (ostirala) Beasainen "Beldur Barik" lehiaketaren sari banaketa izan zen. Bertan DBH4ko Arte Eszenikoetako Orixeko ikasleak egon ziren, publikoaren saria jasotzera joan zirelako egindako lanari esker "Berdintasun gerRAP".

Beldur Barik Euskadi mailan egiten den lehiaketa da 12-20 urtetako gazteei zuzenduta eta grabatutako bideoetan berdintasunaren aldarrikapena egin behar dute.

2023ko irabazle guztiei 17:30etan ongi etorria eman zitzaien Beasaingo Usurbe Antzokian eta ondoren, 18:00etatik 19:00etara zenbait tailer burutu zituzten Beasaingo Udaletxean. Sari banaketa, berriz, Beasaingo Usurbe Antzokian izan zen 19:30etatik 21:00etara. EITBkoek grabatzen egon ziren in streaming.

Gure ikasleentzat momenturik aipagarriena saria jasotzera eszenatokira igo zirenean izan zen. Bertan eskerrak emateaz gain, "Berdintasun gerRAP" abestiaren leloa abestu behar izan zuten ikuslegoak horrela eskatuta. Sarian jasotako 300€-ak ikasbidaiarako joan dira, ikasle saridunek horrela erabakita.

Zorionak mutilak!

Euskararen Nazioarteko eguneko ospakizuna

2023-12-05

 

Euskararen Nazioarteko egunak ospakizun hirukoitza izan du aurten Orixen. Batxilergoko 2. kurtsoko ikasleek abenduaren 1ean ospatu zuten Tolosaldeako Kirol Graduko ikasleek antolatutako ekintza batzuekin. Horien artean, bertso lehiaketa, hamaiketakoa eta herri kirolak. Paper Eskolako eraikineko hiru ikastetxe desberdinetako ikasle-irakasle guztiak elkarrekin aritu ziren ekintzetan gogoz parte hartzen. Abenduaren 4ean DBHko ikasleen txanda izan zen. Ekintza ezberdinetan parte hartu zuten ikasleek eta denak elkarrekin 12tan dantzan aritu ziren eguraldiak lagundu zuen bitartean.

Gaur Batxilergoko 1 mailako ikasleek hitzaldiak izango dituzte Euskalgintzaren Kontseiluak eskainita. Euskaraz bizitzen jarrai dezagun!

ARGAZKIAK IKUSI.

 

 

EUSKARAREN NAZIOARTEKO EGUNA

Abenduaren 3an Euskararen Nazioarteko Eguna ospatzen da. Aurten igandea izanik gure etxeetan eta familiekin egin beharko dugu. Horrek ez du esan nahi hain egun maitatu eta seinalatua ospatu gabe utziko dugunik Orixen. Inondik inora ere!

Orixen ikasleekin Euskararen Nazioarteko eguna abenduaren 4ean ospatuko dugu beraien laguntzaz prestaturiko egitarau harrigarri batekin. Dantza, leihaketa, filmak denetik izango dugu. Animatu parte hartzera, ondo pasa eta euskaraz bizi!  IKUSI PROGRAMA

ELKARKIDETZA PROIEKTUA

 

DBH 2D-ko ikasleak KZP irakasgaiaren barnean, elkarkidetzako proiektua egin dute Samaniegoko ikasleekin. Helburua zaborrari bigarren erabilera bat ematea izan da eta horretarako plastikozko botilak erabiliz, Minion itxura duen arkatzak gordetzeko potoak egin dituzte.

BELDUR BARIK!

Aurten ere gure ikastetxeko ikasleek parte hartu dute BELDUR BARIK lehiaketan. DBH 4. mailako bi lan aurkeztu dira.

Animatu eta bozkatu beraien lanak ondorengo helbidean: https://beldurbarik.eus/14-18-anos/

Hauek dira bideoak:

Berdintasun gerRAP    

Beldur barik

Egin nirekin ere euskaraz!

'Egin nirekin ere euskaraz!' kanpaina abiarazi du UEMAk, euskaldun arrazalizatuen inguruko aurreiritziak gainditzeko deia eginez.

 -  Sustraiak beste herrialdeetan izan arren gurean errotu diren hainbat euskaldunen eskaria da kanpaina, hasiera batean gainerako herritarrek euskara ukatzen dietela sumatuta. 

 - Euskarak kolore asko dituela eta azalaren kolorea askotarikoa izan arren herritar horiek guztiak euskaldunak direla gogoratu nahi du kanpainak.  

Euskaldunak dira Arlenys, Haider, Aimar, Aya, Nora, Sefora, Miruna, Randy, Ekhi, Manna, Anastasia, Andriy, Zunnurain, Lassana, Abdallah, Alaia, Rayan eta Leen, UEMAk gaur Ibarran aurkeztu duen Egin nirekin ere euskaraz! kanpainari aurpegia jarri dioten lagunak.

Urdua, arabiera, mandinga, kitxua, ukrainera, gaztelera edota euskara jaso dute etxean. Euskara, zehazki, lehen hizkuntza da batzuentzat, bigarrena besteentzat, eta baita hirugarrena ere zenbaitentzat.

Hala ere, euskaraz aritzen dira eskolan eta lagunartean. Askotan, ordea, azalaren koloreagatik, aurreiritziengatik edota auskalo zergatik erdaraz hitz egiten diete gainerako herritarrek. Eta ez zaie gustatzen. Euskaldunak direlako. Kanpainako bideoetan adierazi duten moduan, "badakigulako euskara dela zubirik ederrena, eta euskara ukatzen diguten bakoitzean zubia ere ukatzen zaigulako".

 

Berriara bisita

 

Urriaren 19an Community Manager ikasgaiko eta Herbeheretako Harens Lyceum ikastetxeko ikasle batzuk Berriara joan ginen. Euskal Herrian euskaraz argitaratzen duen egunkari bakarra da eta Andoainen dago. Kazetaritzari buruz gehiago ikasteko joan ginen bertara, elkartrukeko proiektu baten helburua baitzen. Horregatik bertako kazetari bat, Ainhoa Oiartzabal, ezagutu eta galderak egin genizkion. Jakin nahi al duzue zer erantzun zuen berak? ARGAZKIAK IKUSI

Adimen Artifiziala hezkuntza

#ErasmusPlus programaren barruan, aste honetan Orixeko digitalizazio arduraduna eta berrikuntza arduradunetako bat Maltan daude adimen artifizialak hezkuntzan dituen aplikazioak aztertzen. Danimarka, Suedia, Alemania, Norwegia eta Italiako irakasleekin batera adimen artifizialak hezkuntzari eskaintzen dizkion aukera eta meatxuak aztertzen ari dira ondoren ikastetxeko digitalizazio planean jarduera desberdinak txertatzeko helburuarekin.

MIKOLOGIKA 2023

 

Tolosako Casino Elkarteak antolatuta eta Tolosako beste ikastetxeekin batera, gure Orixeko DBH 1eko ikasleekin batera Aralarrera joan gara perretxikutara. Aurten eguraldi kaxkarra eduki dugu baina helburua lortu dugu, basoan dauden perretxiku ugari hartu eta Tolosako Mikologia Jardunaldirako erakusgai ederra lortu dugu. Hurrengo urtean eguraldi hobearekin hobeto! ARGAZKIAK IKUSI.

SULTANAREN AMETSA

 

Pasa den asteartean, urriaren10ean, PINTURAKO BATXI 1eko ikasleekin Tabakaleran izan ginen, "Sultanaren ametsa" animazio filmaren sortze-prozesuan oinarritutako erakusketan. Irailaren 15etik - urtarrilaren 7ra Erakusketa aretoa 2 gelan ikusgarri izango dena. Bisita gidatua Nerea Hernandezen eskutik egin genuen, eta ondoren, ikasleek oso positiboki baloratu zuten sormen-lantegian parte hartu zuten. Teknika ezberdinekin esperimentatuz, laburmetrai baterako hondoak sortu zituzten, eta azetato gainean, pertsonaia eta multiplano mahaian animatuko zituzten ebakigarrien irudiak. Animazioan mugimenduaren magia sortzeko gaitasunaz ohartuta egun ederra pasa genuen. Argazkiak ikusteko klikatu HEMEN.

BOLUNTARIOTZA AZOKA

Urriak 18an Batxi 1eko ikasleak boluntariotza-azokara joan dira. Aurtengoan Tolosako Zerkausian egin dute.

Bertan Tolosaldeako hainbat erakunde egon dira beraien eskaintza aurkezten.

Honen helburua gazteen artean boluntariotza sustatzea da, proiektuak ezagutu eta boluntariotza esperimentatzea. Horrela, ikasleek erakunde ezberdinen eskaintza ezagutu ostean, boluntariotza-proiektuetan parte hartzeko aukera izan dezakete. ARGAZKIAK IKUSI

Erasmus+

Martxan dira aurten ere Erasmus+ akreditazioarekin lortutako ekintzak. Lehena martxan da jada, Groningen herritik (Haren Lyceum eskolatik) (Herbehereak) 22 ikasle etorri dira gure DBH 3ko ikasleekin elkartruke bateko kide bezala. Proiektu bat landuko dute beraiekin Community Manager irakasgaiko ikasleek: Informazioa eta medioen alfabetatzea eta astebetez izango dira gure ikastetxean.

Egun hauetan proiektuko lanak egiteaz gain, ATARIA eta BERRIA egunkaria bisitatuko dituzte, Tabakaleran ere hainbat tallerretan parte hartuko dute (1.- Bideogileak / 2.- Serigrafia eta 3.- Mugi, Geldi , Movie) eta Tolosa, Donosita eta beste hainbat toki ezagutzeko aukera izango dute ere, besteak beste.

Ondoren, Batxilergo 1. mailako beste 22 ikasle Belgiraka (Sint Aloysius eskolara) doaz beste elkartruke bateko partaide gisa urriaren 20-27 bitartean. Bertan garapen jasangarriko 17 helburuetako batzuk landuko dira herri eta toki ezberdinak ezagutuz. Proiektuaren izena RAINBOW NATIONS da eta elkarlanean proiektu txiki bat burutzen dugu.

Elkartruke hauek noski beren itzulera izango dute. Gure 3.DBHko ikasleak Groningen hirira joango dira apirilean eta gurean jasoko ditugu Belgikarrak otsailean, bietan proiketuarekin jarraitu eta amaiera emango diogu.

Ezin gara ahaztu, ORIXE BHIko ikasle bat DBH 4ko ikasketak egiten ari dela Irlandako Glenamaddy eskolan. Irailak 1ean joan zen eta Gabonak bitartean izango da han.

Azkenik, bi irakasle ere urrian Maltara doaz “Artificial Intelligence in Education” ikastaroa egitera.

ORIXETIK HARATAGO / ERASMUS+ BATZORDEA

ATARIAOrixeko eta Groningen herriko ikasleen bisita jaso du 'Ataria'-k

 

Mugi Programa

 

Tolosako Udaletxeak antolatuta, aurten ere Orixeko DBH 3ko ikasleekin MUGI programan parte hartuko dugu. Asteazkenero gure ikasleak adineko jendearekin elkartuko dira beraien errealitatea ezagutu eta sentsibilizatzeko. Asteazken honetan oso pozik ibili dira herritik bueltatxo bat ematen, bai adinekoak eta baita gure gazteak ere, eta aukera paregabea izan dute elkarrengandik ikasteko.

ARGAZKIAK IKUSI

Ingeleseko elkarrizketa laguntzailea

 

Ingeleseko elkarrizketa laguntzailea gaur hasi da gurekin lanean: Emmy du izena eta Denver-ekoa da (amerikarra). Emmy Batxilergoko ikasleekin egongo da astean behin, klase bakoitzean ordubeteko saioan egongo da. Ingelesa sustatzeaz gain, ikasleen ahozko gaitasuna sendotu eta garatzea da helburua.

Emmyk atzerritar hizkuntzetako beste irakasleekin batera lan egingo du eta klaseko ordutegia jarraituko du; horrela, ikasleek bestelako jarduera dinamikoagoetan ingelesez elkarren artean hizketan aritzeko modua izango dute.

Ongi etorri ORIXEra Emmy!

DBH-1eko ikasleak Bertizen

 

Aurten ere DBH 1eko Orixeko ikasleekin Bertizen egon gara. Hiru egunetako egonaldia izan da eta bertan, Nafarroako txoko polit honetan, piraguismoa, tirolina, zuhaitzen arteko zirkuituak eta ibilaldiak egin ditugu. Aukera paregabea izan da elkar hobeto ezagutu eta momentu ahaztezinak bizitzeko. Hurrengo urtean berriro!

ARGAZKIAK IKUSI

"Afrika no es un país" hitzaldia

Orixeko Batxilergoko 2. mailako ikasleek KZP irakasgaian Tolosaldean dauden hainbat erakunde ezagutuko dituzte ikasturtean zehar . Gure komunitatea hobeto ezagutu asmoz, Tolosaldean dauden erakunde ezberdinak etorriko zaizkigu gelara. Aste honetan "Divinas" elkarteko kideak izan dira gurean , "Africa no es un país" hitzaldia entzun ahal izan dugu beraien eskutik. Hitzaldia ingelesez izan da eta Afrikar kontinentearekiko mendebaldean dugun aurriritzi eta informazio falta gainditzeko asmoz hurbildu dira gugana. Plazer bat izan da.

Mila esker Divinas!

DBH-1 - JOLAS KOOPERATIBOAK

Joan den astean, harrera planaren barruan, gelako kohesioa lantzeko jolas kooperatiboak egin genituen Samaniego ikastetxeko patioan. Elkar ezagutuz ederki pasa genuen!   ARGAZKIAK IKUSI

Erasmus+ : Unai Urdampilleta Irlandan

2023/09/4

 

ORIXE BHI ko den Unai Urdampilleta ikasleak Irlandako Glenamaddy Communnity School ikastetxean egingo ditu DBH 4ko ikasketak irailean hasi eta abendura bitartean. Ilusioz eta irrikaz joan zen ostiralean aukera paregabe honetaz gozatzera.

Horrez gain, ERASMUS +en finantziaketari esker 2023-24 ikasturtean ere DBH 3 eta Batxilergoko 1 mailako elkartrukeak eta irakasleen formakuntzarako ikastaroak egingo ditugu. Jarraituko dugu informatzen!

IRAKURTZEAK BADU SARIA! – BOOKTUBEAK

 

3. ebaluaketan DBH1eko ikasleek Booktubeak burutu dituzte gaztelania eta ingelesa ikasgaietan. Sortutako bideoak bikainak izan dira eta ondorioz HIZPRO batzordeko kideoi zaila egin zaigu benetan hiru onenak aukeratzea.

Hauek izan dira sarituak: Onditz Esnaola , Eider Amondarain  eta Sugar Zapirain. Hirurek Elkar liburu dendan erosteko opari txartel bana jaso dute.

Hona hemen egindako lan bikainaren beste adibide batzuk: GAZTELANIAZ eta INGELESEZ

Agenda 2030 - UDAL FOROA

2023-06-01

Orixeko ikasleek, Tolosako beste ikastetxeekin batera, Agenda 2030 ekimeneko Udal Foroan aurkeztu dituzte ikasturteko lanketaren emaitzak.

Urtero legez, Orixeko ikasleek, Tolosako beste ikastetxeetako ikasleekin batera, Eskola Agenda 2030 programa garatu dute ikasturtean zehar, herrian garapen jasangarriarekiko konpromisoak ikastetxeetara hurbiltzeko. Maiatzaren 31n, landutakoa Udalari aurkezteko Eskola Agenda 2030 Udal Foroa ospatu zen, udaletxeko batzar aretoan eta bertan, ikastetxe desberdinetako ikasleen ordezkariak elkartu ziren, aurrez aurre, udal ordezkariekin, landutakoaren emaitzen berri emateko.

Aurten bi urteko erronkari eman diote hasiera eta Garapen Iraunkorreko 7. helburua izan da abiapuntua, “Energia irisgarria eta ez kutsakorra”. ARGAZKIAK IKUSI.

Ibon Oregi eta Jon Galarraga-ren hitzaldia

2023-06-01

Ekainaren 1ean, Ibon Oregi eta Jon Galarraga izan genituen DBH1eko Balio Etikoetako eta Heziketa Fisikoko ikasleekin. Kirol egokituaz aritu zitzaizkigun, surfaz eta txirrindularitzaz. Haien testigantza aurkeztu ziguten eta bizitzako erronkei aurre egiteko bizipozaren indarra transmititu. Eskerrik asko, bikote!

KERIK GABEKO EGUNA

2023-05-31

 

Tabako, vaper, kantxinba…ek sortutako kearen inguruko hausnarketa egin ondoren, Kerik gabeko espazio gehiagoren beharra landu dute DBH-1eko ikasleek.

Proiektua nerabeen prebentzio komunitario mahaian parte hartzen duten hainbat erakunderen elkarlanetik sortu zen.

Maiatzak 31an, Tolosako Alondegi plazan izan dira eta mural bat osatu dute Arantxa Orbegozo Txitxiren laguntzaz. ARGAZKIAK IKUSI

PURI PURIAN DAUDEN EKONOMIAKO ALBISTEAK GURE IRAKURLEAREN KABIAKO HEMEROTEKAN

Badira urte batzuk iada, ikasleak aldizkari eta egunkarietara hurbiltzeko helburuarekin, Hemeroteka atala sortu genuela Orixeko Irakurlearen Kabia blogean. Oraingoan Batxilergoko ikasleek ekonomiari loturiko kazetaritza artikulu bana aukeratu eta horren lanketa bat egiten dute. Artikuluak hedabide desberdinetan irakurri dituzte. Horietako batzuk Irakurlearen Kabiako Hemeroteka atalean ikusgai dituzue. Gainera Orixen irakurtzeak saria duenez, guztien artean zozketa bat egin dugu. Hauek izan dira ikasle saridunak:

  • Malen Maiz (Batxi 1)
  • Irati Alonso (Batxi 2)

Elkar liburudendan edo Shanti kirolak dendan erabiltzeko bale bana jaso dute. Zorionak!

Maiatzaren 17a, LGTIBQ+ fobiaren aurkako eguna

 

Gaur maiatzaren 17a, LGTIBQ+ fobiaren aurkako eguna ospatu dugu.

Horretarako Samaniegoko Lehen Hezkuntzako 2. mailako ikasleak lagun izan ditugu. Samaniegoko ikasleek Orixeko ikasleei ortzadarraren koloreko pultsera bana oparitu diete eta egunean zehar soinean eramateko gonbitea egin zaie. Detaile txikia eta polita aldi berean.

LGTBIQ+ kolektiboaren aurkako erasoei STOP !

ARGAZKIAK IKUSI

Euskal Eskola Publikoaren jaialdia

Datorren ekainaren 4ean Euskal Eskola Publikoaren jaialdia ospatuko da Mungian.

Egunaren inguruko informazio gehiago web orrian

Eta motorrak berotzen hasteko...BIDEOKLIPA

Animatu parte hartzera!

ELHUYAR ZIENTZIA AZOKA TOLOSAN

Maiatzaren 6an Tolosan ospatu zen Elhuyar Zientzia Azoka. DBH-ko ikasle batzuk bertan izan ziren ikastetxean egindako hainbat proiektu azaltzen: Arroken Sorrera, Esperimentu azkarrak, Game Over, Trivial jolasa, Orixe Automatikoa, Musika sortzen dugu, Kanikodromoa, Plastikoz inguraturik bizi gara, eta Nire etxebizitza diseinatu. Ikasleek ederki azaldu zituzten beraien proiektuak!

Hau eskertzeko diploma bana jaso zuten ikasleek, eta elkarrekin txokolate beroa eta bizkotxoa dastatuz oroitu genuen Elhuyar Zientzia Azokan bizi izandakoa. Eskerrik asko denei!     ARGAZKIAK IKUSI

Irakurtzeak badu saria!

Hainbat ikasle dira aurten Orixeko liburutegi txartela egin eta mailegutzan liburuak hartu dituztenak.

Hori saritzeko Irakurtzeak badu saria! ekimenaren zozketa bat egin dugu Liburuaren egunaren aitzakian eta hauek izan dira saridunak:

- Ekain Zudaire DBH1

- Joane Mihura DBH1

- Arnaitz Loidi DBH1

Guztiek Elkar liburu dendan edo Shanti Kirolak dendan erabiltzeko bale bana jaso dute. Zuk hurrengo sariduna izan nahi baduzu, gogoratu liburu berriak ditugula liburutegian eta maileguan har ditzakezula.

Egunean Behin 11. denboraldiko irabazleak

Ikastetxeko DBH3, DBH4, Batxi1 eta Batxi2ko ikasle eta irakasleek parte hartu dute Egunean Behineko 11. denboraldian.

Pasa den astean maila bakoitzeko irabazleei zegoekien saria banatu genien.

Hona hemen irabazleen izen-abizenak:

  • DBH 3: Eki Alonso
  • DBH 4: Libe Urdapilleta
  • Batxilergoa 1: Ane Etxebeste
  • Batxilergoa 2: Beñat
  • Lankidea: Aintzane Pikabea

Euskaraz jolastuz irabazi duten sari goxo honekin goza dezatela!

2. DBHko ikasleak Getarian

Apirilaren 25 eta 26 egunetan gure DBH 2ko ikasleekin Getariara joan ginen. Bertan Balenziaga Museoa ezagutu genuen eta "Azaletik Bolumenera" bisita-tailerra burutu genuen. Tailer honetan jantziak diseinatzen eta matematikak zer nolako garrantzia duen ere jabetu ginen.

Ondoren, Getaria herria ezagutzeko "Selfie Running" delako dinamika egin genuen, kostaldeko herri honek dituen altxorrak ezagutzeko beste era bat.

Txangoa primeran atera zen eta hurrengo ikasturterako ekintza berriro errepikatzeko desiatzen gaude.

Argazkiak ikusteko klikatu HEMEN.

ORIXEKO IKASLEAK UDABERRIKO MATEMATIKA LEHIAKETAN

Aurten ere, Orixeko 12 ikaslek Udaberriko Matematika Lehiaketan  hartu dute parte. Lehiaketa Claret Askartza ikastetxeak antolatzen du, Euskal Herriko Unibertsitatearekin elkarlanean, Madrilgo Complutense unibertsitatearen babespean.

1. fasea ikastetxean bertan egin genuen martxoan, eta 2. fasea, berriz, apirilaren 22an Leioako EHUko zientzia eta teknologia fakultatean.

Ikasleak gustora aritu ziren problemak ebazten eta goiz ederra pasata bueltatu ziren etxera, diploma banarekin bertan parte hartzeagatik. Han izan ginen guraso eta irakasleok ere ikasleak animatzen!

Non bizi naiz? proiektuaren amaiera ekitaldia.

 

Apirilak 21ean, batxilergoko lehen mailako zenbait ikasle Tolosako udaletxean izan ziren Non bizi naiz? proiektuaren amaiera-ekitaldian. Bertan, beren lana aurkeztu zuten Tolosako beste ikastetxeetako, Tolosako Udaleko eta Gipuzkoako Foru Aldundiko hainbat ordezkariren aurrean, eta, ondoren, udaletxea eta Idiakez jauregia bisitatu zituzten.

Munduko beste familia batzuen errealitatea ezagutzen

DBH1eko ikasleak 2. ebaluaketan beraien errealitateaz haratago munduko beste familia batzuk nola bizi diren ezagutzeko aukera izan dute Dollar Street proiektuaren bitartez. Hona hemen bi familia konparatu ondoren atera dituzten ondorio batzuk.

 

JOSEBA SARRIONANDIAREN HITZALDIA

 

Martxoaren 13an Joseba Sarrionandia etorri zitzaigun Orixe institutura 1. Batxilergoko ikasleei hitzaldi bat ematera, Sarrionandiaren Munduari bira eman zion ontzia eleberria irakurtzen aritu baikara. Eta 2. ebaluazioari amaiera emateko Josebarekin hitz egiteko plazera izan dugu.

Liburu honetan Elkano eta beste zenbaitek munduari bira nola eman zioten azaltzen du, Josebak liburuari buruzko zenbait datu azaldu zizkigun. Horrez gain, Elkanoren historiari buruz genituen galdera guztiei erantzun interesgarriak eman zizkigun, gustura eta umorez. Sarrionandiak, neurri batean, argitu nahi izan du nobelaren helburua gizarteak Elkanori buruz dituen aurreiritziak argitzea dela, halaber, eleberriarekin haren bizitza zerbait gehiago ezagutaraztea.

Ederra izan zen Joseba Sarrionandiarekin berriketan aritzeko aukera paregabea!

Erasmus+: Ikastetxera bisita

 

Tolosako Lanbide Heziketara, Erasmus + programaren bidez, hainbat herrialdetatik (Portugal, Grezia, Italia, Turkia eta Eslobenia) etorritako 30 irakasleren bisita izan dugu martxoaren 16ean. Orixe BHIko ZIG gelan, Gela Egongorrean eta HIPI gelan egiten den lana ezagutzeko aukera izan dute irakasle hauek. ARGAZKIAK 

PI EGUNEKO MARRAZKI LEHIAKETA

Martxoaren 14ean Nazioarteko Pi eguna ospatzen da. Orixen PI zenbakiaren inguruko marrazki lehiaketarekin ospatu dugu. Parte hartzaileen artean 3 sari banatu ditugu. Lehenengo saria Anyhe Ricok eskuratu zuen. 2. Saria berriz Lorea Azkaratek eta 3. Saria Maitane Ugartemendiak jaso zuen. Hiru sariak banatzeaz gain, 17 parte hartzaileei ikas-material eta gozokidun zorro bat eman zaie. Epaile lanetan plastikako irakasleak aritu dira. Irudi guztiak Gorosabeleko liburutegi eta idazkaritza arteko paretetan egongo dira ikusgai. Hurbiltzeko aukerarik ez duzuenontzat hemen aurkeztutako LANEN ARGAZKIAK

SARI BANAKETAREN ARGAZKIAK

.

Startinnovako finala

Nahiz eta taldekide bat gutxiago izan (gaixo zegoelako), Orixeko ikasleek osatutako K-2 taldekoek podiumean bukatu zuten (hirugarren postuan).

 

Orona Ideora bisita 2. batxilergokoekin

 

Batxilergoko 2. mailako ikasleak Orona Ideo bisitatu dute eta enpresa hobeto ezagutzeko aukera izan dute. Enpresa ekonomia eta Administrazio kudeaketa eta oinarriak ikasgaia dutenak izan dira bertan. ARGAZKIAK IKUSI.

MARTXOAK 8 - Emakumeen Nazioarteko Eguna

 

Gaur, Martxoak 8, Emakumeen Nazioarteko Eguna ospatu dugu institutuan. Ikasleak tailerretan antolatu dira, alde batetik, mutilek pornografiari buruzko ikuspegi kritikoa lantzeko saioa egin dute, eta bestetik, neskek ahalduntze saioa egiteko elkartu dira. Denontzako aberasgarria izan delakoan gaude. Orixe BHI, pertsona kritikoagoak, enpatikoagoak eta ahaldunduagoak hezitzearen alde lanean!

ARGAZKIAK IKUSI

Non bizi naiz? proiektu pilotua

 

Orixeko 1. batxilergoko ikasleak Non bizi naiz? proiektu pilotuan parte hartzen ari dira. Proiektua martxoaren 6an hasi zen eta hiru asteko iraupena izango du.

Ekimen hau Tolosako Udalak eta Gipuzkoako Foru Aldundiak sustatua da, eta Tolosako hiru ikastetxeetako 1. batxilergoko ikasleen partehartzea izango du.

Proiektu honen helburua gazteei hurbileko erakunde publikoak gerturatzea da.

1. batxilergoko ikasleak eskiatzen

Otsailaren 24an 1. batxilergoko ikasleak eskiatzen izan ginen Ezkaraiko Valdezcaray eski estazioan.

Goizean ikastaroa izan genuen, bertan eskiari buruzko oinarrizko nozioak irakatsi zizkiguten. Ondoren, hainbat orduz gora eta behera ibili ginen ikasitakoa praktikatzen. Eguraldiak ere lagundu zuen eta primerako eguna pasa genuen!

Thierry Biscaryren hitzaldia

Pasa den asteartean, otsailak 28, 2. Batxilergoko ikasleok hitzaldi bat izan genuen Tolosako Kultur Etxean Thierry Biscaryren eskutik. Kalakan taldeko abeslari eta txalapartariak, nahiz eta 2009an Madonnarekin munduko bira egin, bere bidea jarraitzea erabaki zuen, musika tradizionala, kantu polifonikoa… Manez eta kobreak diskoa kaleratuz urte batzuk beranduago; 2020an Muda diskoa atera zuen bere izenean.

Mintzaldian, baxenafarrak bere ibilbidearen berri emateaz gain, gure ametsak lortzen saiatzeko aholkua eman zigun. Bestalde, aipatutako Manez eta kobreak diskaren sorkuntza azaldu eta hainbat kanta abestu zizkigun. Hitzaldi honekin, bizitzan benetan nahi dugunaren inguruan hausnarketa egiteko aukera izan genuen. Oso interesgarria izan zen.

ELKARTRUKEA ORIXE BHI -MENEN

 

Astebetez izan dira gure ikastetxe eta familietan. Jasangarritasuna, aniztasuna, dibertsitatea eta beste hainbat ikasgai eta bizipen partekatu ditugu. Esperientzia polita eta aberasgarria.

Erasmus + ek finantziatutako elkartukea izan da. Mila esker denoi!

Bideoa ikusteko KLIKATU HEMEN

Batxilergoko ikasleak ARDITURRIn

Otsailaren 15ean Batxilergo II. mailako Geologia-Lur ikasgaiko ikasleak eta Batxi.I-IIko Latineko ikasleak txango batean parte hartu zuten, hain zuzen, Arditurriko Meategia ezagutzera joan ziren. Hasieran oinez ibilaldi bat egin zuten garai batean trenbidea pasatzen zen lekutik (egun bidegorria da); ondoren, bi taldetan banatuta eta bi giden laguntzarekin, Arditurriko galerietako bat bisitatu zuten erromatarrek bertan egin zituzten lanen berri izateko; bisitaren bigarren zatian inguruko geologia nolakoa den ezagutzeko aukera izan zuten. Eguraldia lagun izan genuen eta txangoa primeran atera zen. ARGAZKIAK IKUSI.

Orixeko irakasleak "Active Learning" ikastaroan

Otsailak 20ko astean OrixeBHI-ko 3 irakasle, Miren Otazo (frantsesa), Iraitz Pikabea (matematika) eta Leire Olazabal (matematika), Bruselas, Belgikara joan dira European Schoolnet proiektuko European Future Classroom Lab-ek antolatutako “Active Learning” ikastaroa egitera. Ikastaro hau Erasmus+ programaren barruan kokatzen da. Programa honen bitartez, ikasle zein irakasleen mugimendua ahalbidetzeko aukera du ikastetxeak. Helburua han ikusi eta ikasitakoarekin ikastetxean eraldaketak egitea da.

Startinnova: Orixeko ikasleak aurten ere finalean

 

Sailkapenean lehenengoak gelditu ondoren, aurten ere Orixeko ikasleak Startinnova ekimenaren finalera heldu dira. Gipuzkoa osoko 180 talde ezberdinek parte hartu dute aurtengoan eta zehatzago esanda bigarren batxilergoko "Administrazio eta kudeaketa oinarriak" ikasgaiko 4 ikasle (K-2 taldekoak: Iker Arana, Manex Ayerza, Xabier Gomez eta Beñat Mateos) heldu dira finalera.

STARTinnova ikasgeletatik jarrera ekintzaileak garatzeko eta sustatzeko asmoz, enpresa, gizarte edo bestelako ekimen-proiektu bat garatzeko beharrezkoak diren metodologia eta tresnei buruzko trebakuntza programa da.

Mimo-alkohola: alkoholaren arriskuaz hausnartzen

 

Tolosako Udaleko prebentzio arlotik antolatuta, otsailaren 10ean DBH2ko ikasleak Tolosako Kultur etxean Mimoarte izenekoko ekintzan parte hartu zuten. Peter Roberts mimo ezagunak eskainitako hainbat mimo sketchen bidez eta gorputz adierazpenaz baliatuta, alkoholaren kontsumoaren inguruko hausnarketa egiteko aukera izan zuten. ARGAZKIAK IKUSI

Tolosako Erdi Aroa ezagutzen

Otsailaren 7 eta 8an DBH2ko ikasleek Tolosako Alde Zaharra ezagutzeko parada izan dugu, Plaza Zaharra, Tolosako harresia, jauregi desberdinak eta Zerkausia. Bestetik Tolosako Santa Maria eliza bisitatu dugu eta bertan teilatura igo gara, egurrezko zutabe erraldoiak ikustera. Irteera Tolosako Turismo Bulegokotik bideratu dugu. Bertan gure gidaria Brian izan da, hizlari oso fina eta jakituna. Pasadizo historiko pila bat kontatu dizkigu eta Erdi Aroko nobleen txutxumutxuak ere, "prentsa larrosa" kontsumitu dugu .

Tolosa hiri garrantzitsua izan da historikoki, horren lekuko Alde Zaharraren tamaina eta eliza desberdinen altura dira. Tolosa zenbat eta gehiago ezagutu gehiago baloratuko dugu baina umiltasunez...

Argazkiak ikusteko klikatu HEMEN.

ATARIA-ra BISITA

 

Joan den ostiralean, otsailak 3, DBH 1eko hainbat ikasleak, Ataria bisitatu eta kazetaritzaren nondik norakoak ezagutzeko aukera izan zuten.

Informazio gehiago LOTURA HONETAN.

Argazki gehiago ikusteko klikatu HEMEN.

HI GAZTE!

 

4. DBHko Plastikako ikasleak lanean aritu diren HI GAZTE! dinamikako sari nagusia jaso dute, hau da, 1000 €. Horrez gain, beste bi sari 100 €-takoak ere irabazi dituzte. Dinamikako bost sarietatik hiru ORIXE BHIra!

Bejondeiela!

Argazkiak  ikusteko KLIKATU HEMEN.

 

EUSKARAREN EGUNA

Aurtengoan Euskararen eguna larunbatez egokitu zenez, bezperan, ostiralean, ospatu genuen gure ikastetxean. Hainbat ekintza burutu genituen. Aipatzekoa da DBH 1eko ikasleek egin zuten jaialditxoa: edalontziak eta goilarak erabiliz perkusio jolasak egin zituzten, ikasleen txarangak patioa alaitu zuen, txapelua dantzatu zuten guztien artean… Jaialdi arrakastatsua izan zen. Eskerrik asko zure lanagatik, Susana! ARGAZKIAK IKUSI

EGUNEAN BEHIN LEHIAKETAKO SARIDUNAK

Egunean Behin euskarazko galdera-erantzun sorta bat da. Egunero partida bakarra jokatu ahal duzu, eta 10 galderari erantzun behar diezu, lehen baino lehen. Zenbat eta erantzun zuzen gehiago, ahalik eta denbora laburrenean, orduan eta hobeto. Orixen azken urteetan online joko honekin lehiaketak egin dira. Aurten 10.a izan da eta hau izan da podioa:

  • DBH 3:  aaiaaraa
  • DBH 4: Libe
  • Batxilergoa 1: Deeiiaanee
  • Batxilergoa 2: Eneko m.
  • Langilea:  Amormixkua

Zorionak irabazleei eta gozatu zuen sariaz, eta beste partaideei eskerrik asko parte hartzeagatik eta ea hurrengoan irabaztea lortzen duzuen.

Startinnova - Elkarrizketa digitala

 

Batxilergoko 2. mailako Administrazio eta Kudeaketa oinarriak ikasgaiko ikasleak Startinnova lehiaketan parte hartzen ari dira. Taldeka enpresa baten sorrera simulatu dute eta Canvas tresna erabiliaz ideia garatzen ari dira.

Elkarrizketa digitala egin zieten Tinc kooperatibako kideei ikastetxean bertan, eta streaming bidez ikusi ahal izan zuten gainontzeko ikastetxeetako ikasleek. Aste honetan bidali behar dituzte ikasleek euren proiektuak.

Informazio gehiago: Startinnova-DV

ABENDUAK 23 EGUN BEREZIA

2023-01-09

Abenduak 23-an DBH-ko ikasle eta irakasleok hainbat ekintzetan parte hartu genuen, eguberritako oporren hasiera ospatzeko.

Goizeko 08:00tan kontsumoari buruz hausnartzeko saio batean aritu ziren DBH1 eta DBH2 ikasleak. Ondoren Gorosabelgo futbol zelaian 2.mailakoek Pin-pon, patata eta lokotx lehiaketa egin zituzten, 1. mailakoek berriz Samaniegoko patio estalian punteria eta sokatira lehiaketa . Gero aldaketa egon zen 10:10etatik 11:30ak arte, 1. mailakoak Gorosabelgo futbol zelaira joan ziren Pin-pon, lokotx eta patata lehiaketan parte hartzera eta 2.mailakoak Samaniegoko patio estalira joan ziren punteria eta sokatiran aritzera. Bukatzeko sari banaketa 11:30tan izan zen Gorosabelgo futbol zelaian.

Bestalde Uzturpen Bolley eta Colpbol-eko txapelketak ospatu ziren DBH 3 eta DBH4ko ikasle eta irakasleen artean 10:00etatik 12:00etara.  ARGAZKIAK IKUSI

Erasmus+ akreditazioa

2022-12-22

 

Joan den abenduaren 16an ikastetxeak lortu duen Erasmus+-eko akreditazio agiria jasotzera joan zen Bilbora, gure ikastetxeko Ikasketa Burua, Miren Otazo Aseguinolaza. Akreditazioa urteetan egindako lanaren ondorio izan da.

Akreditazio honi esker elkartrukeak, irakasleen mugikortasuna eta formazioa eta ikasleen mugikortasuna finantzatu ahalko dira, besteak beste.

Senegaltik eskertza

Senegalgo Kelle herritik hurrengo irudiak iritsi zaizkigu. Orixe eraikin zaharrean soberan eta konpontzeko zeuden hainbat altzari bertara bidali ziren Berastegiko Kellesensa GKEaren bidez. Bertako biztanleek txukundu eta konpondu ondoren, erabilera berri bat emateko prest utzi dituzte eta eskerrak emateko honako argazkiak bidali dizkigute.

ORIXEKO 3 IRAKASLE BELGIKAN IKASTARO BATEAN

2022-11-29

Azaroak 21-25eko astean OrixeBHI-ko 3 irakasle, Josu Etxeberria (teknologia), Aitziber Santa Cruz (ekonomia) eta Itziar Otegi (ingelesa), Bruselas, Belgikara joan dira European Schoolnet proiektuko European Future Classroom Lab-era. Etorkizuneko ikasgeletarako teknologia Interaktiboa izeneko ikastaro bat egitera. Ikastaro hau Erasmus+ ikasle eta irakasleen mugikortasunaren barruan kokatzen da, helburua han ikusi eta ikasitakoarekin ikastetxean sormen gela bat egokitzea da, bertan erabilitako baliabide eta metodologia ikasgeletara eramateko.

IRUÑA-VELEIAra bisita

Asteazkenean, azaroak 23, Latineko, Arteko eta Geografiako ikasleek Iruña-Veleiako erromatar hiriaren gune arkeologikoa ezagutzera joan ziren. Eguraldiak gehiegi lagundu ez zuen arren, irteera primeran atera zen. Lehenengo Gasteiz-eko Arkeologia Museoa bisitatu zuten, hain zuzen, Arabako erromatar aztarnak dauden solairua; ondoren, bisita gidatua Iruña-Veleian in situ jarraitu zuten; irteerari bukaera borobila emateko asmoz, Erdi Aroko Mendozako dorrea ezagutzeko aukera izan zuten. ARGAZKIAK IKUSI

Emakumearen indarkeriaren aurkako nazioarteko eguna

2022-11-25

 

Gaur, Emakumearen indarkeriaren aurkako nazioarteko egunean bat egin dugu SAMANIEGOko eta ORIXEko ikastetxeok indarkeria matxista salatzeko. 800 pertsona inguruk ikastetxeak zeharkatuz giza kate bateratu bat osatu dugu eta Euskal Eskola Publikoan emakumeen aurkako indarkeriarik ez dela onartzen argi adierazi dugu.

Argazkiak ikusteko KLIKATU HEMEN

ELKARTRUKEA

 

 

Belgikako Menen herrian izan gara Batxilergoko 18 ikasleekin. Esperientzia ahaztezina, kultura ezberdinak ezagutu, hizkuntza hobetu, aniztasunaren inguruko lanketa egin eta etorkizunean nahi ditugun herrialde eta bizimodu motaz hausnartu. (Erasmus + finantziazioarekin, mila esker!). BIDEOA IKUSI.

DBH 4ko ikasleek ZUMAIKO FLYSCHa bisitatu dute.

2022-10-28

 

 

Urriaren 25ean, DBH 4ko ikasleak Zumaian izan dira. Bertako Flyscha bisitatu eta geologiako hainbat tailer burutu dituzte Algorri Interpretazio Zentroko begiraleek lagunduta. . ARGAZKIAK IKUSI.

 

MIKOLOGIKA 2022

2022-10-28

Pasa den ostiralean DBH1C taldekoek irteera mikologikoa izan zuten Tolosako beste ikastetxeekin batera. Goizean zehar Aralarreko basoetan ibili ziren bertan aurkitzen zuten perretxiko ezberdin bakoitza bilduz. Ondoren, arratsaldean zehar, Aranzadadiko eta Tolosako Casino elkarteko kideek, ikasleek bildutako perretxiko bakoitza identifikatu eta larunbatean Tolosako Triangulo plazako erakusketan jarri zituzten ikusgai.

Goiz polita pasa zuten gure ikasleek basoan; baita perretxiko goxo, berezi eta interesgarriak bildu ere! Hori bai, kontuan hartu beharreko oharrarekin bueltatu ziren: ongi ezagutu behar dela perretxikoa jan aurretik eta baita izan dezakeen antzekoa eta kaltegarria izan daitekeena ere!

CHARLEVILLE-MÉZIÈREKO IKASLEAK TOLOSAN

2022-10-26

 

Bisitatu gaituzte azkenean Charleville Mézièreseko ikasleek. 2019 ko abenduan Orixeko 10 ikasle, Laskorain eta Herrikideko beste ikasle batzuekin batera Charlevillera joan ziren Tolosako udalak herrien arteko anaitasuna medio antolatutako elkartrukean. Kurtso hartan ikasle frantsesen bisita ezinezkoa izan zen Covid 19arengatik baina hiru urte beranduago burutzea lortu da. GEHIAGO IRAKURRI.

 

HI GAZTE|

2022-10-26

HI GAZTE! dinamikaren harira, 4. DBHko Plastikako ikasle pare bat Orixe BHIko ordezkari bezala Arrasateko Goiena telebistan izan ziren atzo. Bertan, ikastetxeak aurkeztu dituen ikasleen bideo lanez aritu ziren hitz egiten eta Gipuzkoa mailan 1000 €-rekin saritu daitekeen ikastetxea izateko eman beharreko pausoak azaldu zizkieten.

Tolosako Meskitara bisita

2022-10-25

Aste honetan Tolosako Meskitara joan gara DBH 2ko ikasleekin . Bertan Islamaren kultura eta erlijioa hobeto ezagutzeko aukera izan dugu. Eskerrik asko Tolosako Meskitaren arduradunei egindako harrera ona eta goxoarengatik.  Argazkiak ikusteko KLIKATU.


Hitzaldia: "Africa no es un país"

2022-10-18

Orixeko DBH3ko ikasleekin "Divinas" elkarteko kideak izan dira, "Africa no es un país" hitzaldia entzun ahal izan dute beraien bi kideren eskutik. Hitzaldia elebitan izan da ingelesez eta gazteleraz. Afrikar kontinentearekiko mendebaldean dugun aurriritzi eta informazio falta gainditzeko asmoz hurbildu dira gugana. Afrikar kontinentearen historia, geografia, mugimendu kultural etabarri buruz hitz egin digute. Esate baterako... ba al zenekiten Nigerian Nollywood dagoela, estatu batuetan Hollywood-en parekoa? Eta munduko bigarren film ekoizle handiena dela Bollywood-en atzetik? Ezezagunak zaizkigu halaber bertako musika, idazle, hizkuntza etab... Hain gertu eta hain urruti....

HIZKUNTZA ANIZTASUNA

2022-10-14

Orixe BHIko Batxilergo 2. mailan aniztasuna lantzen ari gara. Hizkuntza aniztasunaz jabetzeko eta hausnartzeko Aranburu jauregian dagoen erakusketan izan gara. Bertan Garabide kultur elkarteko kide den Gatxik hizkuntza komunitate minorizatu eta indigenekin egiten duten lankidetza azaldu digu eta Tolosaldeako egoeraz hitz egin dugu ere. Hausnarketa bultzatzeaz gain, inguruko errealitatea ezagutzeko aukera izan dugu hizkuntzaren alorretik. Datorren hilean, UEMAren eskutik beste bi saio izango dituzte ikasle hauek. Mila esker Gatxi!  ARGAZKIAK IKUSI